dinsdag 26 juni 2018 - Entrante 1 di juli 2018 e impuesto nobo 'BAVP' lo drenta na vigor
ORANJESTAD – Departamento di Impuesto ta informa cu dia 1 juli 2018, tin algun cambio den e ley di BBO. Den e ley aki a inclui un impuesto nobo cu yama 'Belasting additionele voorzieningen PPS-projecten' abrevia como BAVP. Pa e motibo aki e nomber di e ley di BBO awor yama: 'Landsverordening belasting over bedrijfsomzetten en additionele voorzieningen PPS-projecten'.
Siguientemente ta sigui un splicacion cortico relaciona cu algun di e cambionan pa cu BBO y BAVP.
Kende tin cu paga BBO/BAVP?
E empresario ta e suheto, pues e ta esun cu tin cu paga BBO y BAVP na Departamento di Impuesto. Un di e cambionan di ley ta encera ampliacion di e concepto di empresario. Pa ley e empresario ta tur esnan cu ta eherce un profesion of empresa independientemente como tambe tur esnan cu ta haci negoshi cu bienes/capital pa saca ganashi permanentemente.
Riba kico ta cobra BBO y BAVP?
Ta cobra BBO y BAVP riba e volumen di benta di empresa (bedrijfsomzet). Esaki ta e suma bruto cu e empresario ta ricibi di su clientenan na momento cu e bende un producto of servicio.
Ora ta papia di e volumen di benta di empresa ta mantene en principio e sistema di cash ('kasstelsel'). Esaki ta nifica cu e debe di BBO/BAVP ta surgi na momento cu e empresario ricibi pago (compensacion) pa e producto of servicio cu el a bende.
Tin posibilidad pa aplica e sistema di factura ('factuurstelsel'). Esaki ta sosode riba peticion di un empresario. Den e caso aki ta paga BBO/BAVP na momento cu e empresa saca un factura pa un producto of servicio bendi. E empresanan cu ya caba tin un decision oficial di inspector (beschikking) pa aplica e sistema di factura ('factuurstelsel'), no tin mester di haci un peticion nobo pa BAVP. Pa motibonan practico Departamento di Impuesto ta aproba pa aplica e mesun decision ey pa BAVP tambe.
Ki momento no tin mester di paga BAVP?
Den e mundo comercial por tin un momento cu un comerciante ta ricibi su pago delanta pero ta entrega su producto of duna su servicio mas despues. Mirando e fecha di 1 di juli 2018 cu BAVP ta drenta na vigor, Departamento di Impuesto ta duna e siguiente aclaracion riba e situacionnan unda pago y entregamento di producto/servicio no ta sosode na mes momento.
|
Prome cu 1 di juli 2018
|
Despues di 1 di juli 2018
|
Comerciante mester paga BAVP?
|
|
E comerciante a bende un producto of a duna un servicio, pero no a ricibi pago ainda di su cliente.
|
E comerciante ta ricibi pago pa e benta.
|
No.
Den e situacion aki no tin base pa paga BAVP, debi cu e benta of servicio a tuma lugar prome cu 1 di juli 2018. Na e momentonan ey e cambio di ley no a drenta na vigor ainda.
|
|
E comerciante a bende y a ricibi pago pa su producto of servicio, pero e no a entrega e producto ainda of e no a duna e servicio ainda na su cliente.
|
E comerciante ta entrega su producto of ta duna su servicio na su cliente
|
No.
Den e situacion aki Departamento di Impuesto ta aproba cu e comerciante no tin mester di paga BAVP teniendo na cuenta cu e sistema di cash ('kasstelsel') ta aplicabel y e suma menciona a wordo ricibi primer cu e cambio di ley a drenta na vigor.
|
Cua ta e tarifa di BBO y BAVP entrante 1 di juli 2018
Entrante 1 di juli 2018 e tarifa di BBO a keda mescos, esta 1,5%. E tarifa di BAVP ta 1,5%. En total e empresario ta paga 3% di e suma ricibi di su di benta di producto of servicio.
Calculacion di BAVP (y BBO)
Aki ta sigui un ehempel con pa calcula BBO y BAVP:
Suma ricibi di benta di producto of servicio Afl. 100
E BBO cu e comerciante mester paga ta Afl. 1,50 (1,5% di 100)
E BAVP cu e comerciante mester paga ta Afl. 1,50 (1,5% di 100)
En total e comerciante ta paga Afl. 3 na Departamento di Impuesto.
Si e comerciante a cobra su cliente Afl. 103 e ora e tin cu paga:
Afl. 1,55 na BBO (1,5% di 103) y
Afl. 1,55 na BAVP (1,5 % di 103)
Den e caso aki e comerciante tin cu paga total Afl. 3,10 na Departamento di Impuesto.
Haci declaracion di BBO/BAVP
E empresario ta haci declaracion y pago di BBO y BAVP riba un base mensual y no mas laat cu dia 15 di cada luna. E prome declaracion ta regarda e luna di juli 2018 y mester haci esaki no mas laat cu dia 15 di augustus 2018. Mescos ta conta pa e pago corespondiente.
Formulario di declaracion
Pa e periodo di juli te cu december 2018, Departamento di Impuesto ta pidi tur empresario pa declara BAVP riba e mesun formulario di BBO/BAZV cu nan a ricibi na comienso di aña. Pues e empresarionan no lo ricibi un formulario di declaracion nobo pa BBO/BAVP/BAZV. Ta intencion pa adapta e formulario di declaracion pa aña fiscal 2019.
Unidad fiscal
Tin empresa cu tin un decision oficial di inspector (beschikking) cu ta permiti e empresa pertenece na un 'unidad fiscal' ('fiscale eenheid'). Pa motibonan practico, Departamento di Impuesto ta aproba cu e mesun decision oficial ey automaticamente ta bira valido tambe pa BAVP.
Comerciante mag di menciona e BBO y BAVP riba e recibo pero e no ta obligatorio
E ley di BBO/BAVP no ta impone pa e comerciante pone e suma di BBO/BAVP riba su recibo. E comerciante mag di menciona e sumanan pero e no ta legalmente obligatorio.
Departamento di Impuesto ta recomenda pa no menciona e suma di BBO/BAVP riba e recibo pa evita eror y confusion pa e consumidor y/of comerciante. Esaki por causa frustracion tambe cerca e consumidor, debi cu e consumidor ta pensa cu e ta esun cu tin cu paga e impuestonan aki locual no ta corecto.
Gerencia di Departamento di Impuesto
25 di juni 2018